【親子餐廳】新！日系風格 x 運動活動場地 Tree Health & Sports

又有新親子餐廳啦！

之前同弟弟去開將軍澳上playgroup，知道附近將軍澳南Tree Health & Sports有間親子餐廳叫Mori Cafe，好啱我帶住兩小去玩。

其實Tree Health & Sports主要係以提供運動活動場地為主，包括：高爾夫球同劍擊。亦有提供興趣班，如：高爾夫球、劍擊空手道、武術班同詠春班等。另外，呢度亦設有試玩高爾夫球體驗，如果有小朋友想試玩，可以以$180喺電子球道上體驗1小時。

除此之外，呢度特別在喺大型嘅高爾夫球體驗場隔離，設有一間Mori Cafe親子餐廳。

雖然親子餐廳場地唔算大，不過就麻雀雖小，五臟俱全，有小朋友最愛嘅瀡滑梯、攀爬設施同煮飯仔等。而且無入場費，只需要喺餐廳消費滿$200就可以比一位小朋友玩/ $300就可以比兩位小朋友/ 而$400 就可以比三位小朋友，可以玩足1.5小時（會有手帶提供作分辦）。

至於餐廳環境方面，坐位之間都有一定嘅距離，不過光線就比較有啲暗。呢度亦有幾張highchair 提供。同埋，玩樂場地同用餐位置都算近，爸媽可以隨時觀察小朋友嘅玩樂情況，都幾方便。另外，餐廳亦設有唔同嘅VIP派對房，可以係呢度搞派對都得。

餐廳係以自助形式點餐，不設加一服務費，所以無論點餐、取餐或食完嘅餐盤都要自己處理好。

至於食物方面，係以主打日式美食，包括有日式丼飯、茶漬飯、烏冬、意粉等，仲有唔同嘅款式小食、甜品等。我哋上次就叫咗兩份小食 （炸魚薯條$88及炸雞$68）、一份朱古力心太軟配軟雪糕$75、一杯菠蘿梳打$48 同牛奶雪糕$33！而食物質素都不過不失，個人覺得炸魚好食過炸雞嘅。

總結：估唔到Playgroup 附近都有間細細地嘅親子餐廳，同弟弟上完Playgroup再帶哥哥去醫肚加放電都ＯＫ。不過本身將軍澳南呢個位都有啲隔涉，如果唔係本區區民嘅話，個人唔太建議專程過嚟啦。

=========================================

Tree Health & Sports

地址：將軍澳唐賢街33號Capri Place地庫B03
網站：www.tree-sport.com
訂座電話：2889-8331

營業時間：
星期一、二、四：10:00-21:00
星期三：12:00-21:00
星期五至日：10:00-22:00

親子餐廳收費：於餐廳內消費$200，1位小朋友即可玩1.5小時；消費滿$300，包2位小朋友；消費滿$400，包3位小朋友，如此類推
高爾夫球電子球道體驗：$180/1小時（一位小朋友）

=========================================

（以上資料更新至撰文當日）
聯絡電郵： alfredbb325@gmail.com
最近開始玩IG，歡迎追縱：allaboutalfred
最近開始玩MeWe，歡迎追縱： https://mewe.com/p/AllAboutAlfred/
追踪更多育兒生活分享，請按 Alfred 成長日記 

駐站BLOGGER:

              

【親子露營】元朗農樂營 | 全新主題房 + 觀星露營帳

我哋又嚟元朗農樂營玩啦！上次12月嚟嘅時候，我哋主要係採摘離地式有機溫室士多啤梨同參加漁塘導賞體驗及網魚。

今次再嚟，估唔到呢度有好大嘅轉變呀！見到佢哋有全新裝修10多間主題房，每間房都好有特式，個人覺得好有台灣民宿感覺，而且呢度變得更Kids Friendly！除咗見到佢哋有個新整嘅大型室外攀爬架，另外，仲有提供室內遊樂設施添，真係落雨都唔怕悶親小朋友呀！

而家無得去旅行，如果聖誕節想考慮帶小朋友去外宿嘅話，元朗農樂營都係一個唔錯嘅選擇，因為佢哋整咗十多間主題房間，每間房都有唔同主題。包括：

男仔鍾意嘅「宇宙太空」太空船連滑梯房　同「紐堡賽道」嘅賽車房。

▲「宇宙太空」太空船連滑梯房

▲「紐堡賽道」嘅賽車房

女仔就有「愛丁堡」公主城堡房　同「波希米亞」主題房。

▲「愛丁堡」公主城堡房

▲「波希米亞」主題房

男女都啱嘅就有「亞馬遜森林」主題房。

▲「亞馬遜森林」主題房

甚至想尋求有旅行感嘅有「希臘愛琴海」主題房　同「泰國皇宮」主題房，泰國皇宮更有特大私人露營花園600呎（可設置2個露營帳）。如果諗住3-4個家庭約埋去玩嘅話，建議大家可以揀「布吉府」同「泰國皇宮」呢兩間主題房，因為兩間房有個相連嘅「後花園」，方便同朋友仔一齊瞓返晚去玩。

▲「希臘愛琴海」主題房

▲「泰國皇宮」主題房

每間房都有「後花園」同設有獨立戶外燒烤設備，一個收費已包自選燒烤食材套餐同燒烤爐。而後花園嘅樓梯就可以上去第二層嘅觀星露營帳。另外，每間房嘅基本設備都好足夠，包括：有獨立洗手間、有冷熱水沖涼、雪櫃同冷氣等。不過就無牙膏、牙刷、電風筒等呢類私人物品提供，所以大家記得要帶埋去呀！

▲相片擷取自農樂營專頁

如果唔想住宿的話，呢度仲有另一個選擇，就係可以喺佢哋嘅「主題小木屋冷氣房 」  或   「京都府大木屋」  開Party。我哋今次人數唔係好多，所以就喺佢哋嘅歐式主題小木屋冷氣房燒野食，歐式主題小木屋冷氣房係連私人屋前花園，仲可以BBQ、唱卡同打麻雀添。

如果人數多嘅話，就可以揀「京都府大木屋＋前後花園」開Party去玩。

另外，呢度亦新增設左唔小玩樂設施，戶外有：大型遊樂場、小型賽車場、兒童手搖船水池、迷你充氣彈床等。

而室內都有個差唔多2000尺嘅室內兒童遊樂室，入面有波波池區、煮飯仔區、充氣彈床等。

最後，營地附近仲有自家五萬呎優質養漁塘同兩萬呎溫室果園，我哋上年年尾就參加左漁塘導賞體驗網魚同採摘有機溫室士多啤梨。

總結：雖然我仲試到呢度嘅住宿體驗，不過就咁睇，比我感覺有啲似台灣嘅民宿風格。如果大家計劃聖誕節想外宿的話，而家又多一個選擇啦！

溫馨提示：

- 保護環境，自己垃圾，自己帶走。

- 請做好防曬或防蚊措施。

- 疫情緩和都唔可以鬆懈，記得勤手洗/搓手，勿摸眼、口、鼻。

- 場內設有免費停車位，但數量有限，先到先得。

 ==========================================

農樂營

預約：KLOOK 
地址：新界元朗牛潭尾路攸潭美村（攸潭美村公所附近）
前往方法：
– 自駕
– 元朗大馬路【開心廣場】後面福康街小巴站/屯馬線元朗站 G出口 ，乘坐37專線小巴，到攸潭美村公所（總站）落車，步行3分鐘即到
– 屯馬線元朗站或東鐵上水站乘坐的士前往，約$70-80元
Facebook：https://www.facebook.com/ytmholidaycamp/

 ==========================================

（以上資料更新至撰文當日）

聯絡電郵： alfredbb325@gmail.com

最近開始玩IG，歡迎追縱：allaboutalfred

最近開始玩MeWe，歡迎追縱： https://mewe.com/p/AllAboutAlfred/

追踪更多育兒生活分享，請按 Alfred 成長日記 

駐站BLOGGER: